ᑐᑲ ᐱᑦᑎᐊᓕᓇᓱᒃᑳᓗᒃ ᑐᒃᑑᓪᓗᓂ ᖁᒃᓴᓱᓕᖃᑦᑕᖅᑐᖅ ᓄᑖᓂᒃ ᐱᓇᓱᖕᓂᐊᓕᕌᖓᒥ − ᐆᒃᑑᑎᒋᓗᒍ ᖁᙱᐊᖅᑕᐅᔭᕆᐊᒃᓴᖅ ᐃᓄᒋᐊᓂᑦ ᐃᓕᓐᓂᐊᓕᓵᖅᑎᓪᓗᒋᑦ. ᐃᓛᓐᓂᒃᑯᑦ ᑐᑲ ᑲᑉᐸᕐᒧᑦ ᖁᐊᖃᑦᑕᖅᑐᖅ ᐅᖃᐅᓯᖃᕐᓂᐊᓕᕌᖓᒥ ᐊᑲᕆᕙᙱᑕᒥᓂᒃ. ᑭᓯᐊᓂ ᑐᑲ ᐱᖃᓐᓇᕆᔭᖏᑦ ᐱᐅᖕᒪᑕ, ᐃᑲᔪᖅᐸᖕᒪᔾᔪᒃ ᐊᓂᒍᐃᔭᕆᐊᒃᓴᖅ ᓯᕘᕋᒋᔭᒥᓂᒃ. ᐃᓕᑦᑎᒻᒪᕆᒃᑐᖅ ᐅᖃᐅᓯᖃᕆᐊᒃᓴᖅ ᐃᒃᐱᒋᔭᒥᓂᒃ!
ᒥᔅ ᐃᓕᓴᐃᔨ ᐃᓕᓴᐃᔨᑦᑎᐊᕙᐅᓂᖅᐹᖅ – ᐱᑦᑎᐊᖅᑐᖅ, ᐱᖃᓐᓂᖅᑐᖅ, ᐃᒃᐱᒍᓱᑦᑎᐊᖅᑐᖅ ᐅᒥᖕᒪᐅᓪᓗᓂ. ᐃᓕᓐᓂᐊᖅᑎᖁᑎᖏᑦ ᐊᒃᓱᕈᓕᕌᖓᑕ ᐃᓕᓐᓂᐊᕐᕕᐊᕈᓯᕐᒥ, ᒥᔅ ᐃᓕᓴᐃᔨ ᐊᐱᖅᓱᓕᖅᐸᒃᑐᖅ ᓈᓚᑦᑎᐊᖅᐸᒃᖢᓂᓗ ᐃᓕᓐᓂᐊᖅᑎᖏᑦᑕ ᐅᖃᖅᑕᖏᓐᓂᒃ. ᐱᓗᐊᖅᑐᒥᒃ, ᐅᖃᐅᔾᔪᐃᑦᑎᐊᖅᐸᒃᑐᖅ ᐃᒃᐱᒍᓱᒃᑐᖃᓗᐊᓕᕌᖓᑦ.
ᐅᒥ ᐅᒥᖕᒪᐅᔪᖅ ᕼᐋᑭᕈᒻᒪᐅᓪᓗᓂ. ᐃᓱᒫᔾᔪᕆᒃᑑᒐᓗᐊᖅ ᑭᓯᐊᓂ ᐳᐃᒍᑐᔪᖅ, ᐃᓛᓐᓂᒃᑯᓪᓗ ᐊᑲᐅᙱᑦᑐᒧᑦ ᑎᑭᐅᑎᔾᔪᑎᒋᕙᒃᐸᐅᒃ. ᐅᓪᓗᖅᑕᖃᓚᐅᖅᓯᒪᕗᖅ ᐃᓚᐅᑎᑦᑎᒋᐊᒃᓴᖅ ᐊᕿᒥᒃ ᐳᐃᒍᓚᐅᕐᒪᑦ ᕼᐋᑭᕐᓂᐊᖅᑎᓪᓗᒋᑦ, ᐊᕿᐅᓪᓗ ᑖᓐᓇ ᐋᓐᓂᕈᑎᒋᓪᓗᓂᐅᒃ. ᐅᒥ ᐃᓕᑦᑎᓚᐅᖅᐳᖅ ᐃᓚᐅᑎᑦᑏᓐᓇᐅᔭᕆᐊᖃᕐᓂᕐᒥᒃ ᒪᒥᐊᓐᓂᕐᒥᒡᓗ ᑕᒻᒪᕐᓂᕌᖓᕕᑦ.
ᓇᐅᑲ ᐃᑲᔪᖅᓯᖅᑎᐅᓂᖅᐸᐅᑐᐃᓐᓇᕆᐊᓕᒃ ᓇᐅᔭᓂᑦ ᓄᓇᕗᒻᒥ. ᐱᐅᓂᖅᓴᒥᒃ ᑕᑯᔪᓐᓇᑦᑎᐊᖅᑐᖅ, ᐱᐅᔪᒦᑦᑐᓐᓇᕐᓂᖓ ᓵᓚᖃᕈᓐᓇᕐᓂᕆᕙᐅᒃ. ᐱᖃᓐᓇᕆᔭᖓ ᑐᑲ ᐊᒃᓱᕈᓕᕌᖓᑦ, ᓇᐅᑲᐅᑉ ᐃᑲᔪᖅᐸᒃᐸᐅᒃ ᑕᑯᑎᖦᖢᓂᐅᒃ ᐱᐅᓂᖅᓴᒥᒃ ᐃᓱᒫᓗᙱᓐᓂᖅᓴᐅᓕᕐᓗᓂᓗ ᖃᓄᖅ ᐊᓯᖏᓐᓂᑦ ᐃᓱᒪᒋᔭᐅᖕᒪᖔᕐᒥ.
ᓇᑦᑎ ᐱᙳᐊᕈᒻᒪᐅᓪᓗᓂ ᐱᑦᑎᐊᖅᖢᓂ ᓇᑦᑎᐅᔪᖅ ᑲᔪᖏᖅᓴᐃᔪᒻᒪᑯᓗᒃ ᐱᖃᓐᓇᕆᔭᒥᓂᒃ. ᑭᓯᐊᓂ ᐃᓛᓐᓂᒃᑯᑦ ᓇᑦᑎ ᓇᒡᓕᒍᓱᒃᑲᐅᓗᐊᓕᖃᑦᑕᖅᑐᖅ, ᐊᑲᐃᓪᓕᐅᕈᑎᒋᔭᐅᓕᔭᑦᑐᖅ ᐱᖃᓐᓇᕆᔭᖓᓄᑦ ᑐᑲᒧᑦ. ᓇᑦᑎ ᑕᐃᒪᐃᙱᑦᑕᕆᐊᒃᓴᖅ ᐊᔪᕐᒪᑦ− ᐱᖃᓐᓇᕆᔭᓂ ᓇᒡᓗᒋᓗᐊᕋᒥᒋᑦ ᖃᐅᔨᑎᑦᑐᒪᕙᖕᒪᒋᑦ!
ᐅᑲ ᓂᙵᒃᓴᕋᐃᑦᑐᑯᓗᒃ ᐅᑲᓕᐅᓪᓗᓂ. ᐅᑲ ᐊᑲᖅᓴᕈᓐᓃᓲᖅ ᖃᓄᑐᐃᓐᓇᖅ ᐱᔪᒪᔭᖓᒎᕈᓐᓃᕌᖓᑦ, ᐆᒃᑑᑎᒋᓗᒍ ᓯᔅᓯ ᑕᕐᕆᔭᕈᒪᑎᓪᓗᒍ ᐅᑲᐅᑉ ᑕᐅᑐᒍᒪᔭᖓᑕ ᐊᓯᐊᓂᒃ, ᐅᕝᕙᓘᓐᓃᑦ ᖃᐅᔨᓴᖅᑕᐅᓂᕐᒥᒃ ᑎᑎᕋᖅᑎᓪᓗᒋᑦ ᓈᓴᐅᑎᑖᖅᑎᑕᐅᒐᒥ ᐊᑦᑎᒃᑐᒥᒃ. ᐃᑲᔪᖅᑕᐅᓪᓗᓂ ᐱᖃᓐᓇᕆᔭᒥᓂᑦ ᑎᐅ−ᑎᐅᒥᑦ, ᐅᑲ ᐃᓕᑦᑎᕗᖅ ᖃᓱᔾᔫᒥᓇᓱᒋᐊᖃᕐᓂᕐᒥᒃ ᐊᓂᖅᓵᕐᔪᐊᖅᐸᒡᓗᓂᓗ, ᓈᓴᐅᑎᑖᖅᑎᑕᐅᓂᖅ ᐊᑦᑎᒃᑐᒥᒃ ᓱᖁᑕᐅᓗᐊᙱᓐᓂᖓᓂᒃ ᐊᒥᓱᓂᒃ ᖁᑦᑎᒃᑐᓂᒃ ᓈᓴᐅᑎᑖᖅᑎᑕᐅᕙᓚᐅᖅᖢᓂ.
ᑕᖁ ᕿᒻᒥᐊᕐᔪᑯᓗᒃ. ᕿᒻᒥᐊᕐᔫᖃᑎᒥᑐᑦ, ᐸᖁᓪᓗᐊᓗᒃ, ᐃᓛᓐᓂᓗ ᐊᑲᐅᙱᑦᑐᒧᑦ ᑎᑭᐅᑎᔾᔪᑎᒋᕙᒃᖢᓂᐅᒃ. ᑕᖁ ᐱᔮᖅᑯᒥᐅᙱᑦᑐᖅ ᓱᕋᒃᓯᓚᐅᖅᐳᖅ ᕕᕕᒃᑯᑦ ᐃᓚᔮᕇᑦ ᐱᓐᓇᕆᔭᖓᓂᒃ ᐃᓕᑦᑎᔭᕆᐊᖃᖅᐳᕐᓗ ᓴᒡᓗᙱᓐᓂᕐᒥᒃ ᓈᒻᒪᒃᓯᑎᑦᑎᒋᐊᖃᖅᐳᕐᓗ ᑕᒻᒪᕐᓂᕌᖓᒥ. ᑕᖁ ᐊᑲᐅᙱᑦᑐᒧᑦ ᑎᑭᐅᑎᓚᐅᖅᐳᖅ ᑲᒪᓱᙱᓐᓂᕐᒥᓄᑦ. ᖁᔭᓇᖅᐳᖅ, ᑕᖁ ᐃᓕᑦᑎᓚᐅᕐᒪᑦ ᐃᒃᐱᒍᓱᑦᑎᐊᕐᓂᕐᒥᒃ ᓈᒻᒪᒃᓯᑎᑦᑎᓪᓗᓂᓗ ᑕᒻᒪᕐᓂᕐᒥᓂᒃ.
ᕕᕕ ᓂᕆᐅᖕᓂᖃᑦᑎᐊᖅᑐᖅ ᐊᐃᕕᐅᓪᓗᓂ ᐅᖃᓕᒫᕈᒻᒪᐅᓪᓗᓂ ᑎᑎᕋᕈᒻᒪᐅᓪᓗᓂᓗ. ᕕᕕᐅᑉ ᐱᖃᓐᓇᕆᔭᓂ ᐃᓕᓐᓂᐊᖅᑎᑉᐸᒃᑕᖏᑦ ᖃᐅᔨᔭᐅᔭᕆᐊᓕᖕᓂᒃ, ᐆᒃᑑᑎᒋᓗᒍ ᐱᒻᒪᕆᐅᓂᖓᓂᒃ ᓱᓕᔪᒥᒃ ᐅᖃᕆᐊᒃᓴᖅ ᑕᒻᒪᕐᓂᕐᒥᒡᓗ ᓈᒻᒪᒃᓯᑎᑦᑎᓂᕐᒥᒃ. ᕕᕕᐅᑉ ᑎᐅ−ᑎᐅ ᑐᑭᓯᑎᓚᐅᕆᕚ ᐃᓕᓐᓂᐊᖅᑎᓕᒫᑦ ᐃᓕᓐᓂᐊᒐᒃᓴᒥᒃ ᐊᔪᖅᑕᖃᕋᓗᐊᕈᑎᒃ, ᖃᓄᐃᙱᓐᓂᖓᓂᒃ.
ᐊᕿ ᓄᓇᓕᖕᓄᐊᕆᐅᖅᑐᖅ. ᐱᖃᓐᓇᕆᔭᖃᙱᓐᓇᒥ, ᑭᐱᙳᓕᖅᑐᖅ. ᐃᓱᒫᓗᒍᑎᒋᕙᐅᒃ ᖃᐅᔨᒪᔭᖃᙱᓐᓂᓂ ᐃᓕᓐᓂᐊᓕᓵᕐᓇᒥ. ᐊᑲᐅᓈᓕᖅᐳᖅ ᐊᕿ ᐱᖃᓐᓇᕆᔭᖅᑖᕐᒪᑦ. ᐊᕿ ᓱᓕ ᐃᓛᓐᓂᒃᑯᑦ ᓄᒫᑦᑕᖃᑦᑕᖅᑐᖅ, ᑭᓯᐊᓂ ᐱᖃᓐᓇᕆᔭᖅᑖᓂ ᐅᖃᐅᑎᕙᐅᒃ , ᐃᓛᓐᓂᒃᑯᑦ ᖃᓄᐃᙱᑦᑐᖅ ᓄᒫᓱᒋᐊᒃᓴᖅ.
ᓯᔅᓯ ᓂᙵᒃᓴᕋᐃᑦᑐᑯᓗᒃ. ᑭᓯᐊᓂ ᑐᑭᓯᓇᖅᑐᖅ! ᐃᓱᒫᓗᒍᑎᖃᕐᒪᑦ ᓄᑲᖅᑖᕐᓂᐊᕐᓂᕐᒥᓂᒃ, ᐃᓛᓐᓂᓗ ᐱᖃᓐᓇᕆᔭᒥᓂᑦ ᑭᑭᑕᐅᕙᒃᑲᒥ ᐱᙳᐊᕐᓂᐊᓕᕌᖓᑕ. ᐃᑲᔪᖅᑕᐅᓪᓗᓂ ᐱᖃᓐᓇᕆᔭᒥᓂᑦ ᑐᑲᒥᑦ, ᓯᔅᓯ ᐃᓕᑦᑎᕗᖅ ᖃᓄᐃᙱᓐᓂᖓᓂᒃ ᐊᑲᖅᓴᙱᓐᓂᖅ, ᑭᓯᐊᓂ ᖃᓄᖓᓴᖅᖢᓂ ᐅᖃᕐᓂᖅ ᐋᓐᓂᖅᓯᓐᓇᕐᒪᑦ ᐊᓯᒥ ᐃᒃᐱᖕᓂᐊᓂᖏᓐᓂᒃ.
ᒥᑭ ᓴᓚᐅᓱᒃᐸᒃᐳᖅ ᐊᕕᙵᐅᓪᓗᓂ ᐅᖃᓕᒫᕈᒻᒪᐅᕗᖅ. ᐅᖃᕋᔪᙱᓚᖅ, ᐅᖃᓕᒫᙱᑦᑕᕌᖓᒥᓗ, ᑲᔪᙱᖅᓴᐃᕙᒃᐳᖅ ᐱᖃᓐᓇᕆᔭᒥᓂᒃ ᐅᖃᐅᔾᔪᐃᑦᑎᐊᖅᐸᒃᖢᓂᒋᑦ ᐊᒃᓱᕈᕐᓇᖅᑐᒃᑰᖅᑎᓪᓗᒋᑦ ᐃᓱᒪᒥᒍᑦ. ᒥᑭ ᓯᓚᑐᑎᒋᕗᖅ ᐃᓐᓇᖅᑐᑦ, ᐃᑲᔪᖅᐸᒃᐳᕐᓗ ᐱᖃᓐᓇᕆᔭᖏᓐᓂᒃ ᐃᓕᓐᓂᐊᖅᑎᖦᖢᓂᒋᑦ ᐅᑕᖅᑭᑦᑎᐊᕆᐊᖃᕐᓂᕐᒥᒃ ᐱᓂᐊᕐᓂᕐᒥᓂᒃ, ᐃᓱᒪᒋᔪᓐᓇᐃᖅᓯᓂᕐᒥᒃ ᐱᑦᑎᐊᙱᑦᑐᓂᒃ, ᕿᓄᐃᓵᕈᓐᓇᕐᓂᕐᒥᓪᓗ ᐊᒃᓱᕈᕐᓇᖅᑐᒃᑰᕋᓗᐊᕐᓗᓂ.
