ᓴᐃᓪᓕᓇᖅᑐᖃᕐᓂᖅ
ᑖᓐᓇ ᐱᓕᕆᐊᒃᓴᖅ ᐊᖓᔪᖅᑳᕆᔭᐅᔪᒧᑦ ᕿᑐᕐᖓᖓᓄᓪᓗ ᑐᕌᖓᔪᓐᓇᖅᑐᖅ, ᐃᓚᔮᕇᓕᒫᓄᓪᓘᓐᓃᑦ. ᐱᓕᕆᐊᒃᓴᖅ ᓴᖅᑭᑎᑦᑎᓂᐅᔪᖅ ᓴᐃᓪᓕᓇᖅᑐᒥᒃ ᐊᖏᕐᕋᕐᒥ ᓄᑕᕋᐅᓪᓘᓐᓃᑦ
ᐃᒡᓗᕈᓯᖓᓂ ᓴᐃᓪᓕᒋᐊᖃᓕᖅᐸᑦ ᐃᓄᑑᕝᕕᒋᓂᐊᖅᑕᖓᓂᒃ ᐃᒃᐱᒍᓱᖕᓂᖓ ᓈᒻᒪᒍᓐᓃᕌᖓᑦ.
ᓄᑕᕋᐅᑉ ᐃᒡᓗᕈᓯᖓᓂᐅᙱᑉᐸᑦ, ᐋᖅᑭᒃᓯᔪᓐᓇᖅᑐᑎᑦ ᓇᓂᑐᐃᓐᓇᖅ ᐃᓚᔮᕇᑦ ᐅᐸᒍᓐᓇᕐᓂᐊᖅᑕᖓᓂᒃ ᓴᐃᓪᓕᔭᕆᐊᖃᓕᕈᑎᒃ. ᓴᐃᓪᓕᕝᕕᒃᓴᒥᒃ ᐋᖅᑭᒃᓯᓂᒃᑯᑦ, ᐊᖓᔪᖅᑳᕆᔭᐅᔪᑦ ᑕᑯᑎᑦᑎᔪᓐᓇᖅᐳᑦ ᕿᑐᕐᖓᖏᑦᑕ ᐃᔾᔪᐊᒐᒃᓴᖓᓂᒃ.
ᐱᒋᐊᕐᓂᕐᒥ, ᓇᓗᓇᐃᔭᐃᓗᑎᑦ ᓴᐃᓪᓕᑲᐅᑎᒋᔪᓐᓇᐃᓪᓕᓐᓇᖅᐸᖕᒪᑦ ᐃᓛᓐᓂᒃᑯᑦ ᐊᑲᖅᓴᙱᓗᐊᖅᖢᓂ. ᐅᖃᐅᓯᖃᕈᓐᓇᖅᑐᑎᑦ ᑕᐃᒪᓐᓇ ᑭᓯᐊᓂ ᐃᓄᑑᓚᐅᑲᒋᐊᖃᕐᓇᖅᐸᖕᒪᑦ ᓴᐃᓪᓕᐅᒥᓇᓱᒡᓗᓂ.
ᕿᑐᕐᖓᐃᑦ ᐱᖃᑎᒋᓗᒍ, ᐊᖏᕐᕋᔅᓯᓐᓂ ᐃᓂᒃᓴᖅᓯᐅᕐᓗᓯᒃ ᐊᖅᑯᓵᖅᑕᐅᒐᔪᙱᑦᑐᒥ ᐃᓄᑑᓐᓇᖅᑐᒥ. ᐃᓂᑖᕈᔅᓯᒃ, ᕿᑐᕐᖓᐃᑦ ᕿᓂᖁᓗᒍ ᐱᖁᑎᓂᒃ ᐱᓯᒪᔪᓐᓇᖅᑕᖏᓐᓂᒃ ᓴᐃᓪᓕᓇᖅᑐᒦᓕᕈᓂ. ᑖᒃᑯᐊ ᐱᖁᑎᑦ ᓴᐃᒻᒪᕈᑎᒋᔪᓐᓇᖅᑕᖏᑦ ᐃᓄᑑᓗᓂ ᐱᓕᕆᐊᕆᔪᓐᓇᕐᓗᓂᒋᑦ ᓴᐃᒻᒪᙱᓐᓂᓕᒫᖓᓂ.
ᐅᑯᓂᖓ ᕿᓂᕐᓗᓯᒃ:
- ᐊᑭᓰᑦ
- ᕿᐲᑦ
- ᐅᖃᓕᒫᒐᑦ
- ᐆᒪᔪᙳᐊᑦ ᐃᓗᓪᓕᖅᓱᖅᓯᒪᔪᑦ
- ᐊᒥᐊᒐᒃᓴᑦ
- ᐊᒥᐅᕈᑏᑦ
- ᑎᒍᒥᐊᒐᑦ, ᐊᖅᓴᕋᓛᑦ ᓂᕈᒥᒃᑐᑦ
ᐱᖁᑎᖃᐅᓕᖅᐸᑦ ᑖᒃᑯᓂᖓ, ᐃᓂᓕᐊᕆᖅᑲᐅᔭᔅᓯᓐᓄᐊᕐᓗᒋᑦ ᐃᓄᑑᕝᕕᒃᓴᖓᓂ ᓴᐃᓪᓕᓇᖅᑐᒥ ᐋᖅᑭᒃᓱᑦᑎᐊᕐᓗᒋᓪᓗ ᕿᑐᕐᖓᕐᓄᑦ ᑲᔾᔮᕐᓇᖅᓯᑎᒋᐊᕐᓗᒍ.
ᐱᖃᑎᒋᓗᒍ ᓂᙵᐅᒪᙳᐊᓕᕐᓗᓯᒃ, ᐃᖏᑦᑕᖅᑐᕐᓗᓯᒃ ᓴᐃᓪᓕᓇᖅᑐᒥ ᐱᓕᕆᖃᑎᒋᓕᕐᓗᒍᓗ ᓂᐱᑭᓵᕐᓗᓯᒃ.
ᖁᕕᐊᓱᒃᑎᓪᓗᒍ ᖃᐅᔨᑎᒋᐊᕐᓗᒍ ᖃᓄᖅ ᐱᔭᕆᐊᖃᕋᔭᕐᒪᖔ ᕿᑐᕐᖓᐃᑦ ᓂᙵᐅᒪᓕᖅᐸᑦ ᐊᑲᖅᓴᕈᓐᓃᖅᐸᓪᓘᓐᓃᑦ, ᑲᔪᖏᖅᓴᕐᓗᒍ ᐃᓄᑑᔭᖅᑐᕈᓐᓇᕐᓂᖓᓂᒃ ᐊᑲᐃᓪᓕᐅᓕᕈᓂ.