ᓈᓚᐅᑎᒃᑰᕐᓂᐅᑉ ᒥᒃᓵᓄᑦ
ᓄᓇᒥᐅᑦ ᐱᖃᓐᓇᕇᑦ ᐃᓕᓐᓂᐊᕈᑎᐅᓪᓗᑎᒃ ᐃᓕᓐᓂᐊᕆᐅᖅᓴᔪᓄᑦ ᐸᕐᓇᒍᑎᐅᔪᑦ ᓱᕈᓯᓛᓄᑦ ᐃᓕᓐᓂᐊᕆᐊᕆᐅᕐᓂᕐᒧᑦ ᓴᖅᑭᔮᖅᑎᑦᑎᔪᑦ ᐃᒃᐱᒃᒍᓲᑎᓂᒃ.
ᑕᕐᕆᔮᒃᓴᑦ ᐱᔾᔪᑎᓖᑦ ᐅᑭᐅᖅᑕᖅᑐᒥᐅᓂᒃ ᐆᒪᔪᓂᒃ ᐱᖃᓐᓇᕇᓂᒃ ᓄᓇᕗᒻᒥ ᐃᓕᓐᓂᐊᖅᖢᑎᒃ ᐃᓕᓴᖅᓯᓂᕐᒥᒃ, ᑕᐃᓯᓂᕐᒥᒃ, ᑐᑭᓯᐅᒪᓂᕐᒥᒡᓗ ᐃᒃᐱᖕᓂᐊᓂᕐᒥᓂᒃ ᓈᒻᒪᒃᑐᒃᑯᑦ. ᑕᑯᑎᑦᑎᖃᑦᑕᖅᑐᑦ ᐱᖃᓐᓇᕇᓂᒃ ᐃᓕᓐᓂᐊᕆᐊᖅᓯᒪᑎᓪᓗᒋᑦ, ᐱᙳᐊᖅᑎᓪᓗᒋᑦ, ᐃᓅᓯᕐᒥᓂ ᓄᑕᖅᑲᑦ ᐊᖅᑯᓵᖅᐸᒃᑕᖏᓐᓂᒃ.
ᐃᑲᔪᖅᑕᐅᓪᓗᑎᒃ ᐱᖃᓐᓇᕆᔭᕐᒥᓂᑦ ᐃᓕᓴᐃᔨᒥᓂᓪᓗ, ᐅᓂᒃᑳᖅᑕᐅᔪᑦ ᑐᑭᓯᕚᓪᓕᖅᐸᒃᐳᑦ ᐃᒃᐱᒋᔭᒥᓂᒃ ᖃᓄᐃᓕᐅᕆᐊᒃᓴᕐᓗ ᓈᒻᒪᒃᑐᒃᑯᑦ.
ᑕᕐᕆᔮᒃᓴᑦ ᒥᑭᓐᓂᖅᓴᓄᑦ ᑐᕌᖓᔪᓂᒃ ᑐᑭᓯᔭᒃᓴᓂᒃ ᓱᕈᓯᓛᓂᑦ ᐊᑐᖅᑕᐅᕙᒃᑐᑎᒍᑦ, ᐆᒃᑑᑎᒋᓗᒍ ᓂᑭᑦᑖᕐᓂᕐᒥᒃ ᐱᙳᐊᖅᑎᓪᓗᒋᑦ, ᑕᑯᒋᐅᕐᓂᕐᒥᒃ ᓄᑲᖅᑖᒥᒃ, ᖁᒃᓴᓱᖕᓂᕐᒥᒡᓗ ᐃᓕᓐᓂᐊᓕᓵᖅᖢᓂ. ᑕᕐᕆᔭᖅᑐᑦ ᑖᒃᑯᓂᖓ ᖃᐅᔨᔪᓐᓇᖅᐳᑦ ᖃᓄᐃᒋᐊᖃᕐᓂᕐᒥᒃ ᐃᒃᐱᒍᓱᓕᕐᓂᕈᑎᒃ ᑖᒃᑯᐊ ᐃᒃᐱᖕᓂᐊᓃᑦ ᐊᔾᔨᖏᓐᓂᒃ.
ᐊᑐᕐᓃᕆᔭᐅᔪᑦ ᓱᕈᓯᓛᓄᑦ
ᓄᓇᒥᐅᑦ ᐱᖃᓐᓇᕇᑦ ᐃᑲᔪᖅᐸᒃᑐᑦ ᓱᕈᓯᓛᓂᒃ ᐅᖃᕈᓐᓇᖅᓯᖁᓪᓗᒋᑦ ᐃᒃᐱᒋᔭᒥᓂᒃ ᐃᒃᐱᒋᓗᐊᖅᑕᒥᓂᑦ ᓴᐃᒻᒪᖁᓪᓗᒋᑦ ᓈᒻᒪᒃᑐᒃᑯᑦ ᖃᓄᐃᙱᑦᑎᐊᓕᖁᓪᓗᒋᑦ. ᑕᑯᑎᑦᑎᓂᒃᑯᑦ ᐃᓅᖃᑎᒌᑦᑎᐊᕐᓂᕐᒥᒃ, ᓄᓇᒥᐅᑦ ᐱᖃᓐᓇᕇᑦ ᐅᓂᒃᑳᖅᑕᐅᔪᑦ ᓴᖅᑭᔮᖅᑎᑦᑎᕙᒃᐳᑦ ᐃᒃᐱᖕᓂᐊᓂᑦᑎᐊᕙᖕᓂᒃ ᓄᑕᖅᑲᓅᖓᔪᓂᒃ.
ᓱᕈᓯᓛᑦ ᑕᐃᓯᔪᓐᓇᖅᓯᒑᖓᒥᒃ ᐃᒃᐱᖕᓂᐊᓂᕐᒥᓂᒃ, ᓇᖕᒥᓂᖅ ᐊᓯᔾᔩᔪᓐᓇᖅᓯᓲᖑᕗᑦ. ᓄᑕᖅᑲᑦ ᐃᒃᐱᖕᓂᐊᓂᕐᒥᓂᒃ ᐊᐅᓚᑦᑎᔪᓐᓇᖅᓯᒑᖓᒥᒃ, ᕿᓄᐃᓵᕈᓐᓇᖅᓯᓂᖅᓴᐅᓲᖑᕗᑦ ᐊᒃᓱᕈᕐᓇᖅᑐᒃᑰᓕᕌᖓᒥᒃ ᐃᓅᓯᖏᓐᓂ ᐃᒻᒥᓂᒡᓗ ᐸᐃᕆᔪᓐᓇᖅᓯᓗᑎᒃ.
ᐃᒃᐱᖕᓂᐊᓂᕐᒥᓂᒃ ᐃᒃᐱᒍᓱᑦᑎᐊᕈᓐᓇᖅᓯᒍᑎᒃ ᐊᓯᖏᑕ ᐃᒃᐱᖕᓂᐊᓂᖏᓐᓂᒃ ᑕᐃᓯᔪᓐᓇᖅᓯᓲᖑᖕᒥᔪᑦ. ᑕᐃᒪᓐᓇ ᓄᑕᖅᑲᑦ ᐃᓅᖃᑎᖃᑦᑎᐊᓕᕈᓐᓇᖅᓯᓲᖑᖕᒪᑕ ᐃᔨᖅᓯᓯᒪᙱᓪᓗᑎᒃ ᐃᒃᐱᖕᓂᐊᓂᕐᒥᓂᒃ ᐊᓯᒥᓂᒡᓗ ᑐᑭᓯᐊᓕᕐᓗᑎᒃ. ᐱᓗᐊᖅᑐᒥᒃ, ᐃᒃᐱᖕᓂᐊᓂᕐᒥᓂᒃ ᑐᑭᓯᐊᑦᑎᐊᓕᕈᑎᑦ ᐃᒻᒥᓂᒡᓗ ᐊᐅᓚᑦᑎᔪᓐᓇᖅᓯᓂᒃᑯᑦ ᓄᑕᕋᑎᓪᓗᒋᑦ ᐃᓅᓯᓕᒫᕐᒥᓂ ᖃᓄᐃᙱᓐᓂᖅᓴᐅᓕᕋᔭᖅᐳᑦ.